قصيده حلووهـ عن الصديق

قصيده عن الصداقه..

الشعـر لـه فاتـل وناقـض وفـاروق
والسـوق لـه سايـم وشـاري وبايـع

واللي ربح ببضاعتـه يمـدح السـوق
والنـاس تطلـب نـادرات البضـايـع

يا مدوّر الطيـب تخيّـر علـى الـذوق
وأحفظ معك من قـول مجرب ودايـع

لو كـان بالإرشـاد والنصـح مسبـوق
ذكـرى لعـل لهـا تـرق السمـايـع

جواهرٍ معهـا شـذى المسـك مرفـوق
ومعهـا التجـارب مثبتـه بالوقـايـع

واللي لبس من جوهر المرجلـه طـوق
مثله مجـرّب والتـجـارب نفـايـع

سافرت لي طرقه وطبيـت لـي سـوق
وخاويت فـي دربـي جميـع النزايـع

والله خلـق بالنـاس ميـزات وفـروق
النـاس تختلف بالشـيـم والطبـايـع

أحـدٍ علـى مبـدأ ولـه نظـرةٍ فـوق
وأحدٍ كمـا ثلـجٍ علـى القـاع مايـع

ولاني وكيـل آدم علـى كـل مخلـوق
لكـن أشـوف بخلـق ربـي نـوايـع

أشفق على الطيب واللـي رفقته شـوق
غريـب وإلا مـن قريـب الجمـايـع

للطيب وأهل الطيب عاشـق ومعشـوق
والطيب لـه مبـدأ وحكم وشرايـع

والمرجله موهوبة مـن الـرب برفـوق
والذ مـه رأس المرجلـه والطمايـع

والرزق من ربي وله فـرض وحقـوق
ومن يطلب أرزاقه من الخلـق ضايـع

والأخـذ بالأسبـاب ثابـت ومـوثـوق
وتوفيـق ربي هـو خيـار الذرايـع

ولا كـل مطـرودٍ كمـا قيـل ملحـوق
قـولٍ مبالـغ فيـه لـو كـان شـايـع

إن ماجلبهـا وآلـي العـرش برفـوق
كثرالمطـارد ما يحـوش النفايـع

ومن يحسن النيه مع النـاس مـرزوق
ومـن يتقي ربه دروبـه سنايـع

والكـذب ثـوبٍ مايجمَّـل ومشـقـوق
ولا ينرقع شقـه بكـثـرالرقـايـع

ومن لا يحط أسـرار قلبـه بصنـدوق
ويجـوَّد المفتـاح عـن كـل صـايـع

يفتح علـى نفسـه مداخـل وطروق
وقناصـة الفرصـه تزيـد الجلايـع

ومن يقـرب الأنـذال لا يأمـن البـوق
النذل خاين مـا يصـون الـودايـع

عقرب ثـرى وإلا كمـا نـأب زاروق
لا صـادف الغـرات للسـم زايـع

وأحـذر تـرى النمـام للشـرناتـوق
دايـم يـقـرَّب للأشـرارالـولايـع

من الصفات خـارب القصـد مسلـوق
وعقلـه لنزغـات الشياطيـن طـايـع

وترى الردي شمعٍ على الحيط ملـزوق
لاأونس حميم الشمـس جـاك متمايـع

أحذف ردي المعرفـة حـذف خملـوق
لا تنخـدع بالزبـرقـه واللمـايـع

عليك بالطيـب ليـا صـرت مزنـوق
يعجبك في فعله كله روايــع

يشيل عنك مـن الصعيبـات طـاروق
ولا يلحـق المنـه جميـل الصنـايـع

واضرب على الكايد ولا يلحقـك عـوق
وأطلـع سنـود وخيرمـولاك لايــع

والشمس لو غابت يجي نور وشـروق
والحق لـه صيـتٍ مـع النـاس ذايـع

وأبليـس أخـو مـره مربَّـط ومفلـوق
وفـي كـل يـوم يـزود حـر ولقايـع

نركي علـى كبـده مراقيـع وحـروق
وعـروق قلبـه مـن وحمنـا مزايـع

وصلوا على الهادي عدد ما أرمش الموق
وعسى لنـا مـن جـود ربـي شفايع